Halkaan ka dhageyso qudbadihii laga jeediyay munaasabadda Dhagax Dhigga Dugsiga sare ee Ceeldheer.

BARASHADA DIINTA ISLAAMKA EE SOOMAALIYA OO GAARTAY IN KUTUBADII CILMIGA LOO XAFIDO SIDA QURAANKA.
Mogadishu - 07-Oct.2007-Allceeldheer.com- Guddoomiyaha degmada Ceeldheer Xuseen Maxamuud Cosoble ayaa dhagax dhigay dhisme dugsi sare oo markii ugu horreysay laga hirgalinayo degmada Ceeldheer ee gobolka G/gaduud ee Bartamaha Somalia.

Guddoomiyaha degmada Ceeldheer oo dhagax dhigaya dhismo dugsi sare oo laga hirgalinayo degmada Ceeldheer

Munaasabadii dhagax dhigga dugsiga sare ee degmada Ceeldheer ayaa waxaa ka qeybgalay qeybaha bulshada ee ku dhaqan degmadaasi, kuwaasi oo ay ku jiraan odayaal caan ka ah degmadaasi, culuma udiin, haween iyo xubno fara badan oo ka tirsan maamulka degmadaasi oo uu horkacayo Guddoomiyaha degmada Ceeldheer Xuseen Maxamuud Cosoble

Odayaasha degmada Ceeldheer oo munaasabadda dhagax dhigga ka dib u duceynaya Jaaliyadaha dibadda ee ka soo jeeda dibadda oo suurto galiyay dhismaha dugsigaasi

Guddoomiyaha xiriirka Jaaliyadaha ee maamulka degmada Ceeldheer, Max'ed Axmed Balli

Munaasabadda dhagax dhigga dhismaha dugsiga sare ee degmada Ceeldheer ayaa ugu horreyntii waxaa ka hadlay guddoomiyaha guddiga xiriirka Jaaliyadaha ee maamulka degmada Ceeldheer Max’ed Axmed Jimcaale (Balli Gaaxsane) isagoo ka war bixiyay dhismaha dugsiga Ceeldheer iyo cidda suurto galisay in degmada Ceeldheer ay hesho markii ugu horreysay dugsi sare, waxa uuna tilmaamay in jaaliyadda ka soo jeeda degmadani ay yihiin kuwa surta geliyay dhismahani wuxuna si gaar ah ugu mahad celiyay jaaliyada ku nool landon oo uu sheegay inay hormuud ka ahaayeen howshani

Muxudiin Sheekh Axmed Caraay (Muxudiin Sheekhaal) oo ku hadlaya magaca odayaasha degmada Ceeldheer

Sidoo kale waxaa munaasabaddaasi ka hadlay Muxudiin Sheekh Axmed Caraay (Muxudiin Sheekhaal) oo ku hadlayay magaca Odayaasha degmada, waxa uuna sheegay in maanta awoodi Karin in uu hadlo farxad aawadeed, waxa uuna hadalkiisa ku soo koobay Mahad celin balaaran oo uu u soo jeediyay jaaliyadaha ka soo jeeda degmadaasi, waxaana wajigiisa ka muuqaneysay Farxad saa’id ah, iyadoo indhihiisana ay ilimo ku soo joogsadeen.

Dadkii kale ee ka hadlay ayaa waxaa ka mid ahaa Cali Culusoow, (Cali Madax), Abuukar Feeroole, Xasan Colaad iyo kuwo kale.

Madiino Cad iyo Xaliimo Xasan Sheekh Axmed Caraay oo ka mid ah haweenka degmada Ceeldheer oo matalaya haweenka degmada Ceeldheer

Madiino Cad oo ka mid ah haweenka degmada Ceeldheer oo ku hadashay magaca haweenka ayaa u mahad celisay jaaliyadda suurto galisay dhismaha dugsiga sare, waxa ayna muujisay sida ay ugu faraxsan tahay in marka ugu horreysa degmada Ceeldheer ay hesho dugsi sare.

Guddoomiyaha degmada Ceeldheer, Xuseen Maxamuud Cosoble oo u mahad celiyay Jaaliyadaha suurto galiyay dhismaha dugsigaan, iyadoo dhinaciisa ay taagan yihiin Abuukar Feeroole iyo Cali Madax.

Guddoomiyaha degmada Ceeldheer, Xuseen Max’ed Cosoble oo ugu dambeyntii Munaasabaddaasi ka hadlay ayaa muujiyay ahmiyadda uu dugsigaan sare u leeyahay degmada Ceeldheer, waxa uuna si gaar ah ugu mahad celiyay jaaliyaddaha suurto galiyay dhismaha dugsigaan, waxa uuna ka codsaday in dadaalka ay sii wadaan ilaa laga helo heerka jaamacadda degmada Ceeldheer, isagoo sheegay in maamulkiisa uu gacan buuxda ka geysan doono wax allaale iyo wixii lagu hormarinayo degmada Ceeldheer.

Odayaal iyo haween ka soo jeeda degmada Ceeldheer oo taagan goobta dhagax dhigga dhismaha dugsiga sare ee degmada Ceeldheer

Goobta munaasabadda ay ka dhaceysay oo aheyd halka laga bilaabay dhismaha dugsiga sare oo dhinaca ku heysa dhismihii dugsiga hoose dhexe ee degmadaasi isla markaana jawiga uu ahaa maalin aad u kulul ayaa odayaahsha iyo haweenka degmada iyo xubnaha maamulka waxa ay u soo lugeeyeen goobta laga dhisayo dugsigaasi si ay u muujiyaan sida ay ugu faraxsan yihiin degmada Ceeldheer oo yeelata dugsi sare markii ugu horreysay.

Dhulka la doonayo in laga dhiso dugsiga sare ee degmada Ceeldheer ayaa dhinaca waqooyi waxa uu kaga dhagan yahay dugsigii hore, waxa uuna ku fadhiyaa dhul cabirkiisu yahay 40X40 Mitir oo isku weer ah.

Abaabulka mashruucan lagu hirgelinayo dugsiga sare ee Magaalada Ceeldheer ayaa biloowday bishii aprill ee sanadkan kadib markii jaaliyada dibada ee magaalada ay isla garteen in la hirgelyo mashaariic horumarineed oo uu ugu horeeyo dugsiga sare ee maanta dhagaxa la dhigay, waxaana xigu doona hadii Alle idmo talaabooyin kale oo kor loogu qaadayo horumarka magaalada Ceeldheer, Miisaaniyada ku baxaysa dhismahaan ayaa waxaa ku deeqay magaalada qaar ka mid ah jaaliyadaha Ceeldheer ee UK, iyadoo jaaliyadaha harsan oo isugu jira qaar aan weli la gaarsiin ololahan & kuwa dibada oo iyagana dhawaan la filayo in ay ka soo qayb galaan Mashaariicda horumarinta ee magaalada Ceeldheer, Masuuliyiin ka tirsan waxgaradkii u istaagay howashan oo nagula soo xiriiray qadka talefanka ayaa u mahadceliyay dhamaan dadkii gacanta ka geystay mashruucan taariikhiga ah iyo kuwa dhiman intaba iyagoo ku amaanay sida wadaninimada & xilkasnimada ah ee ay howshaan uga soo dhalaaleen,

Indho Geelle oo ka mid ah maamulka degmada Ceeldheer

Dhisme Dabaq ah oo magaalada Ceeldheer uu ka dhisanayo mid ka mid ah jaaliyadaha dibadda

Muuqaalka degmada Ceeldheer, xilli uu ka da'ay roob

War bixintaan muuqaalka wadata waxaa Ceeldheer ka soo direy Wariye Mowliid Max'ed Sabriye

Halkaan ka dhageyso qudbadihii laga jeediyay munaasabadda Dhagax Dhigga Dugsiga sare ee Ceeldheer.

BARASHADA DIINTA ISLAAMKA EE SOOMAALIYA OO GAARTAY IN KUTUBADII CILMIGA LOO XAFIDO SIDA QURAANKA.

Allceeldheer news Desk Mogadishu
Contact us E-mail: allceeldheernews@yahoo.com